ජෛවපද්ධති තාක්ෂණවේදය (Biosystems Technology) විෂය සුරක්ෂිතව ගෙදර සිටම හදාරන ඔබට අත්වන වාසි
by පවිත්‍රා ජයසිංහ
☰ 28th Sept. 2021
කොරෝනා ව්‍යසනයත් සමග සාම්ප්‍රදායි අධ්‍යාපනයට සමු දී නවමු අත්දැකීමක්වන මාර්ගගත (Online) අධ්‍යාපන ක්‍රමයට පිවිසීමට ශ්‍රී ලාංකික දූ දරුවන්ට සිදුවිය. එය ශ්‍රී ලාංකිකයන්ට නවමු අත්දැකීමක් වුව ද, ඇමෙරිකාව වැනි රටවල උසස් අධ්‍යාපනය හදාරන සිසුන්ගෙන් 30%කටත් වඩා අද අධ්‍යාපනය ලබන්නේ මාර්ගගතව දුරස්ථ අධ්‍යාපන ක්‍රමයෙනි. වර්තමානයේ දී ඔබට මාර්ගගතව අවශ්‍ය වේලාවට, අවශ්‍ය ඕනෑම තැනකින් ගුණාත්මක අධ්‍යාපනයක් ලබා ගැනීමේ හැකියාව පවතී. උසස් පෙළ සඳහා තාක්ෂණවේදය විෂය මාලාව යටතේ ජෛවපද්ධති තාක්ෂණවේදය හදාරන සිසුවකු වශයෙන් සිද්ධාන්තමය හා ප්‍රායෝගික කරුණු සඳහා ඉගෙනුම් අත්දැකීම් ලබා ගැනීමට මාර්ග ගත ක්‍රමය ඉතා ප්‍රයෝජනවත් ලෙස යොදා ගත හැකිය.
මෙම ලිපියේ අරමුණ වන්නේ අධ්‍යාපනය බෙදා බෙදා හැරීමේ ක්‍රියාවලිය වඩාත් හොඳින් වැඩි දියුණු කළ හැකි ආකාරය පිළිබඳව දෙමාපියන්ව සහ සිසුන්ව දැනුවත් කිරීමයි.
තාක්ෂණවේදය විෂය මාලාව
2013 වර්ෂයේ දී නව විෂය මාලාවක් ලෙස තාක්ෂණවේදය විෂය මාලාව උසස් පෙළ අංශයට එක් කළේ අරමුණු කිහිපයක් මුදුන් පත් කිරීම උදෙසායි. තාක්ෂණික අධ්‍යාපනයේ මූලික කාර්යභාරය වනුයේ ද්‍රව්‍ය, තාක්ෂණික ශිල්ප ක්‍රම පිළිබඳ ගවේෂණය මගින් සමස්ත නිෂ්පාදන ක්‍රියාවලිය, බෙදාදාහැරීම හා කළමනාකරණය මෙන්ම ප්‍රායෝගික අත්දැකීම් තුළින් ඉගෙනුම් ක්‍රියාවලිය පෝෂණය කිරීම හා වැඩ ලෝකය සහ තාක්ෂණික ලෝකය හඳුන්වාදීම මගින් අධ්‍යාපනයේ නිම් වළලු පුළුල් කිරීම බව යුනෙස්කෝව පවසයි. වර්තමානයේ රැකියා වෙළෙඳපොල ඉල්ලුමට සරිලන, නිපුණතාවලින් යුත් පිරිසක් බිහි කිරීම මෙහි මූලික අරමුණකි. විද්‍යා, තාක්ෂණ හා ප්‍රායෝගික අදත්දැකීම් භාවිත ඉගෙනුම් ක්‍රමයෙහි වූ හිඩැස මෙම විෂය මාලාවෙන් සම්පූර්ණ වනු ඇත.
ජෛවපද්ධති තාක්ෂණවේදය හදාරන ඔබ…
මෙම විෂය හදාරණ සිසුන්ට, ඔවුන් ලබා ගන්නා දැනුම හා කුසලතා මගින් ජාතික සංවර්ධන ක්‍රියාවලියට විශාල දායකත්වයක් ලබා දීමට හැකි වනු ඇත. තාක්ෂණය හා සම්බන්ධ මුලික කළමනාකරණ කුසලතා පිළිබඳව මෙම විෂය මගින් තහවුරු කරනු ලබන අතර, නිෂ්පාදන අගය දාම ක්‍රියාවලියේදී තාක්ෂණය සමඟ ඒකාබද්ධ කරමින්, ව්‍යාපාරික ලෝකය දෙස නව මුහුණුවරකින් බැලීම සඳහා අවශ්‍ය දැනුම ලබා දීම ද සිදු කෙරේ. එසේම ව්‍යවහාර දැනුම, කුසලතා හා ආකල්ප තුළින් නවීන තාක්ෂණික දැනුම පදනම් ආර්ථිකයක, අභියෝග හඳුනා ගෙන ඒ සඳහා ප්‍රතිචාර දැක්වීමට සිසුන් හුරු කිරීමද මෙම විෂයෙහි එක් මූලික අරමුණකි.
පරිසර ඉංජිනේරු විද්‍යාව, කෘෂි තාක්ෂණය, ආහාර තාක්ෂණය, ඉලෙක්ට්‍රොනික විද්‍යාව, ජීව වෛද්‍ය ඉංජිනේරු විද්‍යාව ආදී නන් විෂය ක්ෂේත්‍රවල සංකලනයක් වන, මෙම ජෛවපද්ධති තාක්ෂණවේදය විෂය හදාරන ඔබ, ක්ෂේත්‍ර ගණනාවක අත්දැකීම් එක විෂයකින් ලබාගනු ඇත. එය සැබැවින්ම, විවිධත්වයෙන් යුතුව ඉගෙනිය හැකි විචිත්‍රවත් විෂයකි.
මෙය තවදුරටත් තහවුරු කර කරගැනීමට එහි විෂය සන්ධාරය විමසමු.
1) ජෛව පද්ධති සඳහා සුදුසු කාලගුණික තත්ත්ව
2) ජෛව පද්ධති ආශ්‍රිතව පස
3) බිම් මැනීම සහ මට්ටම් ගැනීම
4) ජෛව පද්ධතිවල දී ජල ප්‍රභව
5) ජලයේ ගුණාත්මකභාවය
6) වාණිජ මට්ටමින් ගුණාත්මක පැල නිෂ්පාදනය
7) උසස් තාක්ෂණික ශිල්ප ක්‍රම යොදා ගනිමින් ජලජ ජීව සම්පත් කර්මාන්තයෙහි නියැලීම
8) උසස් තාක්ෂණික ශිල්ප ක්‍රම යොදාගනිමින් සත්ව නිෂ්පාදනයේ නියැලීම
9) ගුණාත්මක ආහාර නිෂ්පාදනය සඳහා ක්‍රමවේද
10) උසස් ගුණාත්මක නිෂ්පාදන සඳහා පසු අස්වනු තාක්ෂණික ශිල්ප ක්‍රම
11) බෝග වගාව සඳහා පාලිත පරිසර තත්ත්ව භාවිතය
12) යාන්ත්‍රීකරණය
13) තිරසාර ලෙස දැවමය හා දැවමය නොවන නිෂ්පාදන පරිභෝජනය
14) උචිත තාක්ෂණික ශිල්ප ක්‍රම භාවිතයෙන් වැවිලි බෝග හා සුළු අපනයන බෝග ආශිත නිෂ්පාදන සැකසීම
15) ක්‍රියාවලි පාලනය හා ස්වයංක්‍රීයකරණය
16) විවිධ රැකියාවන්ට අදාළ වෘත්තිමය ආරක්ෂාව හා සෞඛ්‍ය ක්‍රියා මාර්ග භාවිත කිරීම
17) උද්‍යාන අලංකරණ විද්‍යාව
18) ජෛව පද්ධතිවල තිරසාර සංවර්ධනය සඳහා වැදගත් වන පරිසර හිතකාමී ක්‍රමෝපායන්
19) නිෂ්පාදන සහ ව්‍යාපාර සංවර්ධනය
ජෛවපද්ධති තාක්ෂණවේදය විෂය මාලාවේ ඉහත පාඩම් පෙළගැස්ම සලකා බලන කල, එහි සමාජ අවශ්‍යතාව මනාවට පැහැදිලි වේ. ශ්‍රී ලංකාව තුළ වර්තමානය වන විට පවතින කොරෝනා ව්‍යසනය අබියස, එම විෂය හොඳින් හැදෑරීමට ඔබට මේ මොහොතේ ඇති හොඳම අවස්ථාව මාර්ගගත අධ්‍යාපන ක්‍රමයයි. කොරෝනා වසංගත තත්ත්වය නොමැති තත්ත්වයක වුවත්, ඔබ දරුවන්ගේ ආරක්ෂාව පිළිබඳ නිරතුරුව අවධානයෙන් පසුවන දෙමාපියෙක් නම් එහිදී ද මාර්ග ගත අධ්‍යාපන ක්‍රමය හොඳම විසඳුමකි. විෂය ප්‍රවීණ, නිර්මාණශීලී ගුරුභවතෙකුගේ මනා මඟ පෙන්වීම ඔබට අවශ්‍ය වන්නේ මෙහිදී ය.
ජෛවපද්ධති තාක්ෂණවේදය විෂය සඳහා මාර්ගගත අධ්‍යාපනයට සම්බන්ධ වීමෙන් ඔබට ලැබෙන වාසි දැනගැනීමට දිගටම කියවන්න.
1) ලංකාවේ කොතැනක සිටියත් ගුණාත්මක අධ්‍යාපනයක් ලබා ගැනීමේ හැකියාව ඔබට හිමිවේ.
ඔබ ලංකාවේ කොතැනක සිටියත් විෂය ප්‍රවීණ ගුරු ගුරුභවතෙකුගේ සහාය ලබා ගැනීමට හැකියාව මාර්ගගත අධ්‍යාපන ක්‍රමය ඔස්සේ ඔබට සැලසෙනු ඇත. එහිදී ඔබ සිටිනා ගම, නගරය, පළාත හෝ ප්‍රදේශය කුමක් වුවත් එය අධ්‍යන කටයුතුවලට බාධාවක් නොවේ. ඉහළ ගුණාත්මයෙන් යුතු අධ්‍යාපනයකට හිමිකම් ලැබීමට සිසුවාට හැකියාව පවතී. අසුරු සැනින්, මාර්ගගත ක්‍රමය ඔස්සේ ඔබට අවශ්‍ය පන්තියට සහභාගි වනු ඇත. ගුරුභවතා දිවයිනේ කොතැනක හිටියත් එය ඔබට බාධාවක් නොවේ.
2) එය ඔබගේ කාලය ඉතිරි කරයි.
මාර්ගගත ක්‍රමයට පැවැත්වෙන පන්තියකට සහභාගි වීම සඳහා ඔබට අමතර කාලයක් වැය නොවේ. සාම්පදායික පන්තියකට සහභාගී වීමේ දී , ඒ සඳහා ලක ලැහැස්තිවීමට සහ ගමනාගමනය සඳහා ඔබට විශාල කාලයක් වැය කිරීමට සිදු වේ. මෙසේ අමතරව වැය වන කාලය ඔබට සම්පූර්ණයෙන්ම ඔබගේ අධ්‍යයන කටයුතු සඳහා යොදාග ගත හැකිය.
3) ශිෂ්‍යයාගේ සුරක්ෂිතතාව තහවුරු වේ.
මාර්ගගත ක්‍රමයට ඔබගේ දරුවා පන්තියට සහභාගි වන්නේ නිවසේ සිටය. එබැවින් මගතොටේ දී සිදුවන අනතුරු, වැරදි යහළුවන්ගේ ඇසුරට යොමු වීම, ළමා අපචාරවලට ගොදුරු වීම වැනි දෑ වලට දරුවා ගොදුරු වීම පිළිබඳව ඔබ වද විය යුතු නොවෙයි. තවද, මෙම කොරෝනා වසංගත සමය තුළ ඔබගේ දරුවාගේ සෞඛ්‍යාරක්ෂිතබව තහවුරවුරු කරගත හැකි එකම අධ්‍යයන ක්‍රමය මාර්ගගත අධ්‍යාපනයයි.
4) ඉතා නම්‍යශීලී ලෙස ශිෂ්‍යයාට හා ගුරුවරයාට පහසු පරිදි කාල වේලාවක් තෝරා ගත හැකිය.
මාර්ගගත අධ්‍යාපනය ඔබගේ කාල කළමනාකරණ කුසලතා දියුණු කරයි. ගුරුවරයාට හා සිසුවාට පොදු න්‍යාය පත්‍රයක් තිබීම දෙපාර්ශවයටම පහසුවක් ඇති කරයි. තම ජීවිතයේ තීරණාත්මක කඩඉමක් වන උසස් පෙළ විභාගයට පෙනී සිටින සිසුවා, තම අභිවෘද්ධියය උදෙසා කාලය නිසි පරිදි කළමනාකරණය කිරීම ඉතා අත්‍යවශ්‍ය දෙයකි.
5) එය අභිරුචිකරණය කළ ඉගෙනුම් අත්දැකීමක් ලබා ගැනීමට ඉඩ සලසයි.
මාර්ගගත අධ්‍යාපන ක්‍රමයේ දී ඉතා නිර්මාණශීලී ලෙස තම පාඩම් මෙහෙයවීමට ප්‍රවීණ ගුරුවරයාට වැඩි අවකාශයක් ලැබෙයි. එබැවින් සිසුවාට ඉතාමත් පහසුවෙන් පාඩම් අවබෝධ කර ගැනීමේ අවස්ථාව උදාවේ. ශිෂ්‍යයාගේ අධ්‍යයන වේගයට උචිත ලෙස පාඩම් මෙහෙයවීම, වීඩියෝ සහ අනෙකුත් ඉගෙනුම් ආධාරක උපයෝගී කරගනිමින් පාඩම කරගෙන යාමට මාර්ගගත අධ්‍යාපන ක්‍රමය වැඩි අවස්ථාවක් ලබාදීම ශිෂ්‍යයාට වඩාත් උනන්දුවෙන් ඉගෙනීමෙහි නිරත වීමට හේතුවක් වෙයි.
6) ශිෂ්‍ය හා ගුරුවරයා අතර වැඩි අන්තර් ක්‍රියාකාරීත්වයක් සහ වැඩි ප්‍රතිචාරයක් ලබා ගැනීමට ඉඩ සලසයි.
සාම්ප්‍රදායික පන්ති කාමරයක සිසුන් විශාල ප්‍රමාණයක් එරෙහි එකවර අවධානය යොමු කිරීමට සිදුවීමෙන් එක් එක් දරුවා පිළිබඳ නිසි වැටහීමක් ලබා ගැනීමේ අවස්ථාව ගුරුවරයාගෙන් ගිලිහේ. නමුත් මාර්ගගත අධ්‍යාපනයේ දී තනි දරුවෙකු කෙරෙහි අවධානය යොමුකළ හැකි බැවින් ගුරුවරයාට ශිෂ්‍යාව හඳුනා ගැනීම පහසු වේ. එබැවින් සිසුවාගේ ඉගෙනුම් අවශ්‍යතාවය තේරුම් ගනිමින් ඊට ගැළපෙන ලෙස ඉගෙනුම්-ඉගැන්වීම් ක්‍රියාවලිය මෙහෙයවීම සඳහා ගුරුවරයාට අවස්ථාව ලැබේ.
7) සාම්ප්‍රදායික ක්‍රමයට වඩා ලාභදායී වේ.
සාම්ප්‍රදායික පන්තියකට සහභාගි වීමේදී ඇඳුම් පැළඳුම් සඳහා වැයවන වියදම්, ප්‍රවාහන වියදම් සහ අනෙකුත් වියදම් බොහෝමයක් මාර්ගගත අධ්‍යාපනයේ අවශ්‍ය නොවේ. මෙහිදී භාවිතාවන මෘදුකාංග හරහා අන්තර්ජාලය හා සම්බන්ධ වීමට ඔබට ගෙවිය යුතු ගාස්තුව ද ලාභ දායී අන්තර්ජාල පැකේජ හරහා පහසුවෙන් කරගත හැකි වේ. එබැවින් අද වන විට සාම්ප්‍රදායික පන්ති කාමරයකට සහභාගිවීමට සාපේක්ෂව මාර්ගගත ක්‍රමයට පන්තියකට සහභාගී වීම වඩා ලාභදායී වේ.
සාරාංශය
මෙම ලිපියේ අරමුණ වූයේ මාර්ගගත (online) අධ්‍යාපනය වඩාත් සාර්ථක ලෙස උසස් පෙළ ජෛවපද්ධති තාක්ෂණවේදය විෂය හැදෑරීම සඳහා යොදා ගැනීම කළ හැකි ද යන වග සහ එහි පවතින වාසිදායක තත්ත්වය ඔබ හට අවබෝධ කර දීමයි. සෑම තාක්ෂණික ක්‍රමයකම දොසක් දකිනවාට වඩා එය ඔබේ සාර්ථකත්වය පිණිස යොදා ගත හැක්කේ කෙසේ ද යන වග විමසා බැලීම වටී. එබැවින් මාර්ගගත අධ්‍යාපනය ඔබගේ දරුවාගේ දිවියේ සාර්ථකත්වය පිණිස යොදා ගත හැකි ඉතා කදිම මෙවලමකි.
Classes from the Author
Classes from other tutors
Useful Information
Features
fb/panthi.lkFree classifieds - Copyright © 2021