හැඳි නොගා හදන හොද්දයි... දඬුවම් නොදී හදන දරුවයි...

by Aloka Liyanage
☰ 28th Oct. 2021

දරුවන්ගේ මුල් ගුරුවරු දෙමව්පියන් ය. දෙමව්පියෝ කුඩා කල සිට දරුවන් අධ්‍යාපනය කරා යොමු කරති. පහේ ශිෂ්‍යත්වය අවසන් වන විට පවතින තරගකාරී අධ්‍යාපන රටාව සමග දරුවන්ට අධ්‍යාපනය මෙන්ම දෙමව්පියන් ද නීරස වීම අරුමයක් නොවේ. දෙමව්පියන් වශයෙන් ඔබ කළ යුත්තේ තම දරුවන් අධ්‍යාපනය කරා දක්කාගෙන යාම නොවේ. ඔවුන් පසුපස යමින් දිරි ගැන්වීමත්, අතරමග නතර වීමට නොදී සවියක් වීමත්, වෙනත් මාර්ග කරා යොමුවීමට නොදී යහමග පෙන්වීමත් ය.

වැඩිම කලක් ළමාවිය ගතකරන සත්වයා මිනිසාය. එසේම අධ්‍යාපනය ලැබීමට සුදුසුම විය ළමා වියයි. දෙමව්පියන් ලෙස ඔබ වෙත පැවරී ඇති ප්‍රධානම වගකීම නම් දරුවන්ගේ සිත් හි අධ්‍යාපනය කෙරෙහි තරගකාරී හැගීමක් ඇති නොවීමට වගබලා ගැනීමයි. තරගකාරී අධ්‍යාපන රටාවේ අවසාන ප්‍රතිඵලය වන්නේ ආත්මාර්ථකාමී මිනිසෙකු බිහිවීමයි.

දෙමවිපියන් බොහෝ විට දරුවන් අධ්‍යාපනයට යොමු කරන්නේ තරවටු කිරීමෙනි. එවිට ඔවුන්ට අධ්‍යාපනය එපාවනවා මෙන්ම දෙමවිපියන් කෙරෙහි ද තරහවක් උපදී. පාඩම් කිරීම යන වචනය පවා ඔවුන්ගේ කුඩා සිත් තුළ සෘණාත්මක සිතුවිලි ඇතිකිරීමට පටන් ගනී. එබැවින් අධ්‍යාපනය යන ආකල්පය ඔබේ දරුවගේ සිතේ ඇතිකරනු ලබන හැගීම තීරණය කරන තීරකයා ලෙස ඔබේ දරුවාට ඔවුන්ගේ ළමා විය නිදහසේ විදිමින් ඉගෙනීමට ඉඩ හරින්න. බලකිරීමෙන් තොරව ස්ව කැමැත්තෙන්ම පාඩම් කිරීමට මග පාදන්න. ඉගෙනීමේ අගය කරුණාවෙන් කියා දෙන්න. දඩුවමින් තොරව ආදරයෙන් සියල්ල වටහා දෙන්න. ඔබට එක් ශරීර දඩුවමක් කුඩා දඩුවමක් වුවද දරුවාගේ කුඩා මනසට එය බරපතල වේදනාවක් ඇතිකිරීමට සමත්ය. ඔවුන්ට කුඩා ඉලක්ක ලබා දෙන්න. උදාහරණයක් ලෙස ගෙදරවැඩ සම්පූර්ණ කළහොත් ඔවුන් කැමති සෙල්ලම් බඩුවක් අරන්දීම වැනි ඉලක්ක. එසේම ශාරීරික දඩුවම් වෙනුවට ඔවුන් වඩාත් ප්‍රිය කරන දෙයක් ඔවුන්ගෙන් ඈත් කිරීම වැනි දඩුවම් ලබා දෙන්න. උදාහරණයක් ලෙස පාඩම් නොකල හොත් ඔවුන් ප්‍රිය කරන කාටුන් වැඩසටහන නැරඹීමට නොදීම වැනි දඩුවම්.

දෙමවිපියන් ලෙස දරුවන්ගේ සිත් තුළ ඔබ අද වපුරනු ලබන බීජ මත ඔවුන් හෙට අස්වනු නොලා ගනු ඇත. සැරපරුෂ බැණ වැදීම් හා ශාරීරික දඩුවම් හෙට දිනයේ මුළු මහත් සමාජයටම වෛර කරනු ලබන පුද්ගලයෙකු බිහි කරයි. ආදරය හා අවබෝධය මගින් ආදරණිය මිනිසෙකු ඔබට සමාජයට තිළිණ කළ හැක. දෙමව්පියන් ලෙස වගකීම ඔබ අතේය. සමාජයට වෛර කරන ආත්මාර්ථකාමී පුද්ගලයෙකු වෙනුවට මුළු මහත් සමාජයම ආදරය කරන හා ආදරය ලබන ආදරණීය සැබෑම මිනිසෙකු බිහි කරන්න.

Author

Aloka Liyanage
HND in Psychology, BSc in Psychology (UG) UK
Contact: 076 389 2970

Miss Aloka teaches in a popular international school. She has 10 years of experience in teaching.